Europam longe plures Agenoris, Phenicum regis, genitam dicunt. Actum volunt, ut ex montibus in litus Phenicum lasciviens virgo armenta patris sequeretur et deinde rapta confestim atque nave, cuius albus taurus erat insigne, deferretur in Cretam.
Ex his fabulam, quā legitur Mercurium impulisse ad litus armenta Phenicum et Iovem in taurum versum natantemque in Cretam Europam virginem asportasse, causam sumpsisse liquido patet. Verum in tempore rapine huius prisci discrepant. Hanc aliqui a Iove oppressam simpliciter volunt et ex eo filios peperisse.